【急症室日常】
理論上，流感高峰潮每年有兩個，一冬一夏。小弟曾經係香港某大醫院實習過一段時間，發現原來呢一個只係一個美麗嘅謊言。實習第一日，某高級醫生已經嘆左啖氣：「冬天咁多人，夏天咁多人，中間大家都係事無大小黎睇急症，跟本成年就係一大個高峰期。」
睇返數字，龍頭醫院急症室非緊急排隊時間一定不少於兩三小時，繁忙如女皇醫院者，請等候九小時或以上。係某龍頭醫院實習，見過病人從到達急症室至收上病房，需時廿四小時。
當等入院病人太多，病床太少，就會出現所謂Admission Block嘅情況，做成女皇醫院急症室中間通道排左十幾廿張病床嘅奇景。
為左處理呢個情況，觀察病房（Observation Room，亦即係 O房）就會成為正式病房，收容應上病房而又未上得病房嘅病人。平時嘅O房只係用黎觀察，例如醉酒人士等酒醒、暈眩少女要坐多陣，將其轉為正式病房，又要係前線掉多兩個醫生入去。
少左兩個醫生，剩低嘅就又要加速睇症，但係當真正急症發生嘅時候，又走多幾個入房進行急救。呢到走幾個，個到走幾個，有時甚至會出現診症格無人睇症既情況。呢個時候，就會有幾個用金睛火眼望實診症格嘅病人開始投訴。
樓上病房知道自己門口有條隊等入院，都會盡量騰空病床，出得院嘅出院、轉得去其他聯網醫院嘅就轉。大部份病人當然恨不得出院，但係又見過唔少家人病人不斷阻止，話「check清楚先好」。呢個要求其實係極度正常，但係香港嘅醫療系統裏面就成為左「不合理」。
醫療人員做到扒左係到都仲有幾十個病人排緊隊睇症，走廊有廿張病床等收上病房，病房跟本無床亦都轉唔走病人，走廊只可以越放越多床，床與床之間再攝多兩張床。當護士千方百計要騰空位置嘅時候，病人家屬亦都千方百計投訴冷氣凍、唔夠被、可唔可以唔收錢、點解等咁耐。係做野同解釋之間爭扎，忽然有人開咪：「R房留位......56歲男士......GCS 5分.....三分鐘後到！」，所有人即刻搞掂手頭上工作仆入急救室。
大家都好合理，但係成件事好唔合理。
歡迎黎到急症室。
Search